Левица: Уапсени моќници со дрога, блиски до Максим и ЗНАМ во Охрид
Во текот на минатата недела, во акција на Охридската полиција, со поголема количина дрога беа уапсени три лица, кои се директни поддржувачи и финансиери на партијата на Максим Димитриевски. На трите лица им е изречена и мерка притвор, соопшти Левица.
„Иако се работи за поголема акција на полицијата, иако праксата на МВР е задолжително да ја информира јавноста - МВР овој пат МОЛЧИ! Настанот е евидентиран само во Дневниот билтен, додека отсуствува било каква информација до медиумите.
Оттука Левица јавно прашува дали Министерството за правда ù е доделено на Партијата ЗНАМ, за да ги штити криминалците во своите редови кои директно ја финансираат?!
Ја информираме јавноста дека овие лица одамна ù се познати на полицијата по своите криминогени активности, но поради нивните врски со високи функционери, истите никогаш не се изведени пред лицето на правдата.
Впрочем, уапсените лица се во роднински врски со џелатот на транзицијата - Бранко ЦРВЕНКОВСКИ и истите јавно ја поддржаа партијата ЗНАМ на последните избори.
Левица го повикува новоизбраниот министер на МВР, Панче ТОШКОВСКИ, да не се обиде да го заташкува овој случај, со цел да го заштити својот помал коалиционен партнер! Јасно е дека проектот ЗНАМ е составен од истрошени политичари и криминални финансиери, кои биле директно дел од трулиот систем на неказнивост и како такви, немаат ниту капацитет, ниту политичка волја да спроведат реална промена за обичните граѓани!“. стои во соопштението на Левица.
24.06.2024 - 10:12
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
