Рубио: Треба да има договор за териториите и каде ќе се повлечат границите

За да се постигне мировен договор, и двете страни, односно и Русија и Украина треба да направат отстапки, но и да очекуваат нешто да добијат, што е многу тешко да се постигне, вели државниот секретар на САД, Марко Рубио во интервју за „Фејс д нејшн“ на Си-Би-Ес, кое беше реализирано по Самитот на Аљаска и пред вчерашното доаѓање на претседателот на Украина, Володомир Зеленски и европските лидери на состанок во Вашингтон.

Рубио потенцира дека меѓу двете страни има големи разлики за крупните прашања и во моментов ниту Русија, ниту Украина се подготвени да попуштат.

Тој смета дека концентрацијата треба да биде на работите кои биле дискутирани на Самитот во Аљаска, меѓу рускиот претседател Владимир Путин и претседателот на САД Доналд Трамп, а кои се потенцијал за пробиви, за напредок.

Треба да се најдат области каде што има напредок во разговорите, вели државниот секреар на САД, и да се направи обид за намалување на јазот меѓу двете страни.

– Но, постои причина зошто оваа војна трае веќе три и пол години, а тоа е дека кога станува збор за клучните прашања, сè уште има некои големи разлики меѓу двете страни. Да видиме колку напредок можеме да продолжиме да постигнеме. Не е лесно, но тоа е нешто што претседателот го направи како приоритет. Мирот. И тој заслужува голема пофалба за тоа – заклучува Рубио.

Тој ги отфрли конструкциите дека европските лидери дојдоа во Вашингтон за да спречат Зеленски да биде малтретиран од страна на Трамп и да се натера да потпише нешто против својата волја. Рубио потенцира дека со европските лидери работат на прашањето за безбедносни гаранции за Украина.