Потресна исповед на вработената во поштата во Катланово: "Со нож ми се закануваше дека ќе ме убие ако не му ги дадам парите"

Вработената во поштата во Катланово која пред два дена повторно беше ограбена, си ја отвори душата и раскажа за хоророт низ кој поминала кога кредецот влегол додека таа била на смена и со закана со нож и ги побарал парите. 63-годишната Божана Маневска за Дневник, раскажува дека крадецот силно ја удрил по што таа паднала на подот и се онесвестила.

- Ми рече ќе те убијам ако не ми ги дадеш парите и со дршката од ножот со сета сила ме удри по десната рака. Од чантата ги зедов клучевите од сефот на поштата, го отворив и потоа силно ме удри по тилот. Повеќе ништо не се сеќавам, вели вознемирената жена за Дневник.

Таа раскажува дека во поштата разбојникот влегол само што пристигнала. Ја погледнал и и се обратил со зборовите Каде си стара пријателке, по што го извадил ножот, а таа се стаписала. 

- Сега имам болки по раката и главата. Со рачката од ножот ме удри и ми се закани дека ќе ме убие. Јас се исплашив и додека го отворав сефот си велев „Господе, само да останам жива“. Потоа силно ме удри по тилот и веќе не се сеќавам на ништо, додава преплашената Божана.

Божана 33 години работи во истата пошта. Вели оти никогаш немало чувар, ниту аларм. Но по ова разбојништво категорична е дека нема повеќе да се врати на работното место. 

- Нема аларм ниту чувар. Работев сама. Затоа апелирам кој и да дојде сега на моето работно место да бара да му донесат чувар оти Kатланово е опасно место за живеење. Селото е фреквентно, а полиција нема,вели Божана, за Дневник.

Ова не е прв пат да  биде ограбена поштата во Катланово. Минатата година во месец јануари крадец влезе во поштата, а и тогаш се случи истото, вработената се онесвести, а крадецот си замина со торби полни со 331.000 денари.

Овојпат, крадецот однел 400.000 денари.