Обвинителството назначи лице за случаите на Антикорупциска - од 10 кривични пријави нема ниту една истрага

По поплаките од членовите на Антикорупциската комисија, Обвинителството сега назначува лице задолжено да постапува по случаите кои ги отвора комисијата. Оваа информација вечерва ја соопшти претседателката на ДКСК, Билјана Ивановска во интервју за Канал 5. 

-Точно е дека нашите пријави се доставуваат до Јавното обвинителство коешто досега многу малку, скоро ич не изреагира позитивно. Но, ете има еден зрак надеж. Неодамна воспоставивме комуникација со лице од Обвинителството кое што е назначено да соработува со Државната комисија. Тоа лице побара од нас да дадеме список на сите иницијативи дадени до Јавно обвинителство за да видат до каде се предметите. Ова е веќе еден чекор напред, кој што оди во насока на подобрување на соработката со Јавното обвинителство. Искрено се надевам дека нешто ќе се случи после ова, рече Ивановска во интервју за Канал 5.

Ова доаѓа откако Ивановска претходно се пожали дека ниту една од кривичните пријави кои во тригодишниот мандат Антикорупциската комисија ги доставила до Јавното обвинителство ја нема поминато ниту почетната предистражна фаза. Во последниот мандат, ДКСК достави вкупно 10 кривични пријави. Сите состави на ДКСК досега поднеле 163 кривични пријави до обвинителствата, но само три стигнале до судење.