Премиерот: Во услови на ваква трагедија во Кочани, ќе беше аматерски неиздржано да продолжи процесот за смена на Коцевски

Претседателот на Владата Христијан Мицкоски ги отфрли обвинувањата дека постои некаков договор со јавниот обвинител Љупчо Коцевски. Тој посочи дека во услови на ваква трагедија, која што се случи во Кочани, ќе беше аматерски неиздржано да продолжи процесот за негова смена, а да се игнорира целата истрага.

Според Мицкоски, доколку продолжеше процесот на смена на јавниот обвинител Љупчо Коцевски, ќе испратеа порака дека ја игнорираат истрагата, за да реализираат нивна цел.

-Тоа денеска го кажа пратеникот Димитар Апасиев на собраниската говорница, тој тоа го претстави како на ти го, дај ми го. Видете возможни се такви сценарија и таков тип на небулози кои што се шират, но работата е секогаш многу поедноставна од тоа како изгледа. Никој од нас не вели дека е задоволен од работата на Љупчо Коцевски, но ќе беше аматерски неиздржано ако ние во услови на еден ваков случај, на една ваква трагедија како што е овој, продолжиме со процесот на смена. Тогаш ние каква порака ќе испратевме? Дека ние игнорираме се, игнорираме истрага и се што е вклучено таму, за да реализираме некаква си наша цел. И јас не мислам дека тоа е политички искусно и умно, посочи  Мицкоски во вечерашното гостување на телевизија Алфа.

Говорејќи за трагедијата во Кочани, Мицкоски истакна дека е гневен за сите пропусти на системот изминативе години, но посочи дека има една група на „глодари“ кои се обидоа да ја злоупотребат несреќата за политички да профитираат и на истите им порача дека ќе бидат поразени.

-Тие сега го користат гневот на народот, за кој јас кажав дека сочувствувам, и јас сум гневен како и вие, како и многумина поради сите оние системски слабости кои се случувале децении назад и тука нема дилема и како што беа 99 проценти од луѓето кои излегоа прво да изразат сочувство, а второ и да на еден емотивен начин го покажат својот гнев и револт за се што се случувало децении наназад. Сега има мала група глодари кои се обидоа од тоа да направат политички поени и да привлечат внимание кон себе, нагласи премиерот Мицкоски.

Во однос на обвинувањата од страна на пратеникот Димитар Апасиев, Мицкоски рече дека Апасиев купил три пати поевтин деловен простор во центарот на Скопје.

-Политичката партија Левица кон крајот на ноември 2024 година купува во центарот на Скопје деловен простор, подрум и приземје, 420 метри квадратни, по цена со ДДВ 295.000 евра. Би рекол или е подарок заради остварување на некаква цел, или договорот има и втор дел кој што ние не го гледаме, и затоа јас реков органите сето тоа да го проверат. Нели Левица беше против извршители, но извршители кога продаваат ваков тип на имот не им пречат. Па тој извршител кој што е за тој објект е истиот извршител на Соравиа кој што ќе се продава на лицитација таму некаде после 20 април. И двете имаат иста финансиска институција која ги обединува а тоа е првата инвестициска банка, банка која функционира во македонскиот банкарскиот систем а е сопственост на бугарски бизнисмени, рече Мицкоски.