Принцот Хари тврди дека кралското семејство криело за хакирањето на неговиот телефон

Војводата од Сасекс го обвини кралското семејство дека „без сомнение долго време му криеле информации за хакирање на неговиот телефон бидејќи не сакале да отворат лименка со црви“.

Обвинувањето го изнесе принцот Хари во својата изјава како сведок во случајот за повреда на приватноста против „Асошиетед њузпејперс“, издавачот на „Дејли мејл“ и „Мејл он сандеј“.

Британскиот принц Хари неделава е во Лондон за да сведочи во судската постапка што тој ја поведе против издавачот на двата весника.

На вториот ден од прелиминарното сослушување во лондонскиот Кралски суд на правдата издавачот тврдеше дека дел од случајот треба да се отфрли бидејќи се потпира на документи доставени доверливо до „истрагата Левесон“.

Наводите што ги демантира тужениот се однесуваат на ангажирање приватни истражувачи за поставување уреди за прислушување во автомобили и пристап и снимање приватни телефонски разговори.

Неколку британски медиуми пренесоа дека на вториот ден од прелиминарното сослушување војводата од Сасекс го обвинил сопственото семејство дека не го известило кога станало јасно дека неговиот телефон бил прислушуван.

Тие наводно криеле од него бидејќи не сакале тој да поднесе обвинение. Тој бил принуден да се согласи со правилото наметнато од неговото семејство – никогаш да не се жали и никогаш да не објаснува во врска со односите со печатените медиуми.

Тужба против издавачот на весниците „Дејли мејл“ и „Мејл он сандеј“, „Асошиетед њузпејперс“ – поднесоа, меѓу другите, и Елтон Џон и Елизабет Харли.

Издавачот наводно ја нарушил приватноста на многу познати личности.