СДСМ: 11 години ВМРО-ДПМНЕ го крадеше народот

Владејачката СДСМ обвинува дека опозициската ВМРО-ДПМНЕ 11 години го крадела народот.

-Партијата која кога беше на власт 11 години крадеше и го задолжуваше народот за да гради луксузна бела палата од каде денес шири лажни вести, да гради споменици кои се распаѓаат и за да се богати партиското раководство, нема кредибилитет да зборува за економија.  ВМРО ДПМНЕ е партија која и во опозиција се противеше и ја кочеше финансиката поддршка за граѓаните и стопанството и правеше се’ за парите да не стигнат таму каде што се најпотребни.  Нивните функционери јавно се противеа на концептот парите назад кај граѓаните, се противеа и на покачувањето на минималната плата. Во најтешкиот период од пандемијата од Ковид 19, преку дополнителната заменичка министерка за финансии, ВМРО ДПМНЕ со месеци кочеше заем од Светска банка, пари наменети за инвестиции во здравството и за помош на најранливите, реагираат од СДСМ по прес-конференцијата на Гордана Димитриеска – Кочоска од ВМРО-ДПМНЕ.

Оттаму велат дека Владата на СДСМ се соочила и со враќање на долговите кои ВМРО-ДПМНЕ ги направила за проектот „Скопје 2014“.

-“Немаме за леб, трошиме на чоколадо”, тоа е ВМРО ДПМНЕ и нивниот однос кон парите на граѓаните кој и денес не е променет.  Денес, парите одат кај граѓаните.  Во домаќинствата и во компаниите преку пакетот мерки во време на пандемија директно се вбризгани над 65 милијарди денари. Македонска економија оди кон стабилни и поголеми стапки на раст и тоа го потврдуваат сите економски податоци, се вели во реакцијата.