Силен ветер со брзина од над 75 км на час го оштети покривот на училиштето „Коле Нехтенин“ во Штип

Силниот ветар со брзина од над 75 километри на час оштети дел од покривот на Средното општинско училиште „Коле Нехтенин“ во Штип. 

Директорката на СОУ „Коле Нехтенин“ - Штип Јованка Шалева изјави дека кога паднал дел од покровот, нема повредени ученици и наставници, а наставата се одвива без проблеми. Посочи дека утринава учениците и наставниците биле информирани да не излегуваат надвор во дворот на училиштето.

-За жал заради слиниот ветар на највисокиот дел од покровот на нашето училиштето имаме оштетување, со тоа што во најбрз временски период мора да го решаваме тој проблем, вели Шалева.

МИА претходно информираше дека поради силниот ветар  низ населбите во Штип има и откорнати дрвја, паднати гранки, а има и пријави на оштетени автомобили.

Директорот на ЈП „Исар“ - Штип Александар Арсовски информираше дека  имале околу 20 интервенции, додека пак штипските пожарникари имале четири интервенции.

Според УХМР, има портокалово предупредување за ветер. Исто така се апелира граѓаните да бидат внимателни и да не се движат на места каде има високи дрва со цел да се заштитат.