Заев: Да помагаме на сите, без разлика дали ги познаваме или не
„Завршуваме година во која доминираа моментите посветени на животот, на солидарноста, на хуманоста, на сегашноста и иднината.
Потсетувајќи на сѐ што сме постигнале во минатото, повикувам да ги искористиме празничните денови и да дадеме уште поголемо значење на вредностите кои носат радост. Повикувам да помагаме, да направиме сѐ што можеме да им биде подобро на луѓето околу нас, без разлика дали ги познаваме или не“. Ваква порака испраќа поранешниот премиер Зоран Заев во честитка на социјалната мрежа Фејсбук по повод Новата година.
„Фондацијата Заев преку низа предновогодишни активности, но и преку целата година, подава рака и дава директна помош на различни индивидуи, групи, заедници и институции, со цел да ги направиме нашето македонско општество, но и општествата околу нас, поубави места за живеење.
Покрај директната помош на ранливите категории и на институциите кои им помагаат на граѓаните, преку серија активности, настани и конференции ги поддржавме политиките на регионална соработка, соживот, мир, добрососедство и демократски развој, како и промоцијата на македонскиот јазик дома, но и насекаде низ светот.
Во 2023 година да продолжиме да даваме поддршка секому. Еден спасен живот - спасен цел свет. Една насмевка повеќе - радост за цел свет“, пишува Заев.
„Во текот на 2022 година, преку Фондацијата “Заев - едно општество за сите”:
- обезбедивме апарат за реанимација на новороденчиња за Клиниката по гинекологија и акушерство во Скопје, апарат кој досега не постоеше на Клиниката а со кој се спасуваат животи на новороденчиња, особено оние кои се родени пред време
- дониравме апарат за дијагностика од областа на урологијата во струмичката болница
- поделивме пакетчиња за деца на улица, деца на самохрани родители, деца без лична документација и деца на бездомни родители во ромските маала од скопските општини: Шуто Оризари, Аеродром (Керамидница), Гази Баба (Кванташки пазар), Карпош (Момин поток), Бутел (Визбегово) и Маџари (Рамка), во соработка со невладината Амбрела
- овозможивме екскурзија и посета на Крушево за децата корисници на социјални услуги од групните домови при јавните установи „11 Октомври“ и „25 Мај“ во соработка со Министерството за труд и социјална политика
- ги поддржавме спотските новинари од регионот да ја продолжат својата мисија за соработка и промоција на мирот преку спортски активности
- доделивме вредносни ваучери за директна помош на 150 семејства од социјално ранливи категории
- обезбедивме перики за жените борки кои се справуваат со ракот на дојка и заедно со нив упативме порака за навремени прегледи со цел рана превенција на ракот и со тоа создавање можност сечиj живот да победи и продолжи понатаму
- помогнавме социјални активности на 350 деца од установата „Детска радост“ – Струмица, во рамки на одбележувањето на Неделата на детето
- дониравме спортски реквизити на Здружението на пензионери - Струмица
- го поддржавме ликовниот хепенинг по повод Денот на мирот организиран од ученицитеи менторите од училиштата од Струмица, Ново Село, Босилово и Василевово, во соработка со Дом за деца и млади “Благој Мучето“ од Струмица
- го поддржавме театарскиот проект “Сам против сите” чија тема е борбата против аксиозноста и депресијата
- дониравме помош за семејствата на четири куќи од Прилеп кои беа опожарени од удар на гром, во соработка со СОС Детско село
- ги поддржавме со донација Амир Дестанов од „Дневниот центар за деца на улица“ и ученик во ООУ „Браќа Рамиз и Хамид“ во Шуто Оризари и младиот генијалец Македон Димитровски, ученик во ОУ „Лирија“ во Тетово, честитајќи им го Меѓународниот ден на младите
- испративме 20 тони македонска хуманитарна помош за војската и за цивилното население кое ја брани својата сувереност во Украина“, се вели во објавата на поранешниот премиер.
31.12.2022 - 10:20
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
