Граѓаните побараа оставки од надлежните за Онкологија: „Додека Вие јадете бифтеци, болните јадат паштети“

Убијци, предавници, правда за жртвите, оставка, се дел од пораките кои револтираните граѓани по скандалот со Онкологија вечерва им ги упатија на надлежните од пред Владата.

„Само додека ние плаќаме за да имаме квалитетно образование, здравство и судство овие господа живеат во лускуз, јадат бифтеци додека пациентите во болниците јадат паштети а секој втор граѓанин одвај може да си приушти еден оброк дневно. Е па господа да ве прашам, имате ли барем тронка грижа на совест за ова што ни го правите со онкологија. Заработувате на мизеријата на нашите најмили: татковци, мајки синови и ќерки“, порачаа организаторите.

Барањата или ултиматумот од овој протест, како што беше посочено се: ОЈО да излезе со детали за текот на истрагата во рок од една недела; истрага за инволвираноста на поранешниот министер Венко Филипче и на директорот Нино Васев; проширување на истрагата на работата на детската онкологија; целосна ревизија на работата на Клиниката за онкологија; правосилни судски пресуди за сите инволвирани во злосторството и криминалот на Онкологија; вклучување онколошки пациенти, кои ќе имаат увид во самата истрага.

„Чашата е прелеана а тие се спремни да одат до крај и да си ги измијат рацете преку новите измени на Кривичниот законик, беше порачано од протестот. Масовните протести да станат норма против неправдата“, кажаа дел од учесниците.