Српскиот премиер во посета на Косово
Српскиот премиер Александар Вучиќ денеска ги повика Србите од Косово да не ги продаваат своите имоти и им порача дека државата ќе остане со нив и ќе им помага, пренесува Танјуг.
Вучиќ денеска го посети селото Пасјане и во него отвори породилиште. Ова е прва посета на српски премиер на овој регион на Косово од 1999 година.
- Владата на Србија не ве заборави и никогаш нема да ве заборави. Имаме намера и тука, како и во Грачаница и Косовска Митровица, да отвориме свои канцеларии, изјави српскиот премиер пред неколку илјади граѓани, кои го пречекаа со овации и српски знамиња.
Вучиќ истакна дека е неопходно поголемо присуство на српските институции во Косово, како и поголемо инвестирање.
- Наша работа е да ви обезбедиме патишта, да ви обезбедиме работа,
рече тој.
Отворајќи го породилиштето, српскиот премиер рече дека во Косово се раѓаат најголем број деца во Србија.
- Тоа е нашата лулка и никој нема да не спречи децата тука да продолжат да се раѓаат, рече тој.
Српскиот премиер истакна дека Владата на Србија сака да има мир и стабилност и рече дека Србите треба да имаат добри односи со соседите Албанци.
Во посетата на Косово заедно со српскиот премиер се и министерот за одбрана на Србија, Братислав Гашиќ, министерот за правда, Никола Селаковиќ, министерот за внатрешни работи, Небојша Стефановиќ, министерот за здравство, Златибор Лончар, и министерот за труд Александар Вулин.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа