ВМРО-ДПМНЕ ги осудува сите обиди да се повредуваат индивидуалните права

ВМРО-ДПМНЕ ги осудува сите обиди да се повредуваат индивидуалните права, дури и кога тоа се прави под превезот на наводен револт на студентите, се вели во нивното соопштение.

Во продолжение следува интегрален текст од соопштението на ВМРО-ДПМНЕ.

Тоа што деновиве и се случува на професор Тања Каракамишева на Правниот факултет е класична дискриминација и насилство врз неа само заради искажано сопствено професионално мислење и сопствен став.

Професорката Каракамишева е жртва на закани и навреди, само заради тоа што не го зборува тоа што неколкумина студенти сакаат да го слушнат. Професорката Каракамишева е насилно попречувана во својата работа, само заради тоа што говори различно од професорите Фрчкоски и Павлова-Данева.

Уште пострашно во целата ситуација е тоа што Деканот на Правен факултет, Борче Давитковски неколку дена не презема ништо и не постапува по барањата на професор Тања Каракамишева за да и бидат овозможени услови за работа како и на останатите професори.

ВМРО-ДПМНЕ апелира Деканот Давитковски да покаже дека е недозволиво некој да биде дискриминиран и навредуван само заради искажан став кој не им се допаѓа на малкумина. Тоа е негова обврска и кон професорите, но и кон сегашните и идни студенти на Правниот факултет.