ВМРО-ДПМНЕ: СДСМ во свое време планираше да ја продаде Градската болница и да ја претвори во хотел

Интегрален текст од соопштението на ВМРО-ДПМНЕ

За СДСМ Градската болница не беше место каде што граѓаните треба да добиваат поквалитетни здравствени услуги, туку само можност за лично богатење на функционерите на оваа партија.

Лицемерите од Бихаќка денес во нивниот познат стил на лажни душегрижници се обидуваат да проблематизираат темелна реконструкција која е во тек во овој објект.

Не само што со прст не мрднаа и ниту една шајка не заковаа во Градска болница, туку и им пречи кога некој друг работи и ги подобрува условите во објектите од јавното здравство.

Типично за СДСМ. За ништо не ги бива, освен за критика на нешто што некој друг направил преку безочни лаги и ефтини пропагандни трикови.

Во старата Градска болница во тек е темелна реконструкција. Вкупната инвестиција на Клиниката „Св. Наум Охридски“ изнесува 125 милиони денари за градежните работи. Со реконструкцијата ќе се опфатат сите болнички соби, оперативниот блок, интензивната нега, Центарот за изгореници, стерилизацијата и др. Реконструкцијата опфаќа и изведба на тоалети во секоја болничка соба, како и комплетна замена на прозорците.

Ова ќе биде прва темелна реконструкција на оваа јавна здравствена установа во 80 години од нејзиното постоење.