Андонова: Расте црниот биланс на Гинекологија - родилките во паника

Црниот биланс на Клиниката за Гинекологија расне. Сите се исплашени. Исплашени се идните родилки, но и оние кои во моментов се наоѓаат таму. Исплашени се нивните најблиски и не знаат што се случува во болницата, обвинува Марија Андонова од ВМРО-ДПМНЕ

„Вчера во јавноста протече уште една информација дека имало починато и четврто новороденче. Починало уште едно бебе, а министерството за здравство го прикрива случајот. Јавноста дознава благодарение на некој новинар или медиум што ќе се охрабри да пишува за хаосот што го предизвикуваат кадрите на Заев.

Зошто Клиниката за гинекологија го премолчи случајот? Зошто министерството за здравство го премолчи случајот? Што се случува на Клиниката за гинекологија? За само три дена имаме четири починати бебиња, а институциите молчат и бегаат од одговорност.“ – вели Андонова

Таа потенцира дека родителите на трите бебиња кои починаа на Клиниката за гинекологија се гневни и бараат одговорност

„ВМРО-ДПМНЕ предупредуваше дека СДС со брутална партизација на институциите и со поставувањето на некомпетентни партиски кадри државата ја турка во хаос.

ВМРО-ДПМНЕ предупредуваше и дека именувањето на Викторија Јовановска за директор на Гинекологија само заради тоа што била блиска другарка на сопругата на Зоран Заев, Зорица Заева ќе има сериозни последици.

Скандалот мора да биде испитан до крај. Не смее да се прикрива ништо!

Господа од СДС, уште колку животи треба да згаснат за да запре безредието кое го создавате во македонскиот здравствен систем?“ – прашува Андонова и додава дека ВМРО-ДПМНЕ предупредувало но како што вели, за Заев, Таравари, Милошев и Јовановска, човечкиот живот не претставува ништо.

„Здравството е во хаос и ако кај одговорните во овој ресор има грам морал и доблест, ќе си поднесат оставка и ќе си заминат од ова професија.

Поради целосната негрижа, Заев и СДС на претстојните локални избори на 15-ти октомври ќе бидат казнети од страна на граѓаните и делигитимирани од политичката јавност.“ – вели Андонова.