ВМРО-ДПМНЕ: Македонија под власта на СДСМ има најлоши резултати во борбата против коронавирусот

Македонија под власта на СДСМ има најлоши резултати во борбата против коронавирусот, велат од ВМРО-ДПМНЕ како реакција на прес-конференцијата која во Владата ја одржаа техничкиот премиер Оливер Спасовски, вицепремиерот Бујар Османи, министерот Венко Филипче и д-р Жарко Караџоски од Институтот за јавно здравје.

Оттаму велат дека власта не треба да ја бара вината кај народот, туку властите се неспособни да се справат со короната.

-Додека другите држави во окружувањето и по 10 тина дена немаат регистрирано ниту еден нов случај, Македонија бележи и ново заразени и нови смртни случаи. Словенија, Хрватска и Црна Гора немаат нови случаи повеќе од 10 дена. Македонија иако имаше ригорозни мерки не се справи со вирусот. Не се справи заради лошиот менаџмент на владата. Лекарите, медицинските сестри и болничарите сами си купуваа заштитна опрема. Државата буквално беше оставена на милост и немилост, се вели во реакцијата.

Неспособноста на СДСМ, велат од опозициската ВМРО-ДПМНЕ, за која сега виновни се граѓаните кои ги затворија како во притвор два месеци дома ќе ги чини токму граѓаните 1.3 милијарди евра до крајот на годината, за кои државата ќе треба да се задолжи.

-За целиот неуспех и некадарност сега го обвинуваат народот. Не можат сами да се сносат ниту со сопствените грешки. СДСМ ја урива државата. Со ноншаланиот и неодговорен однос на СДСМ не можеме понатаму. Потребна е итна стратегија за обнова на Македонија. ВМРО-ДПМНЕ знае како. ВМРО ДПМНЕ е различно од СДСМ. Со СДСМ и Заев, добивме хибриден режим, неспособност, криминал и сиромаштија.