Генералниот секретар на НАТО: Стратегијата на Путин во Украина нема да успее

Генералниот секретар на НАТО, Јенс Столтенберг остро ги осуди денешните нови руски ракетни напади врз Украина нагласувајќи дека руската стратегија во таа земја нема да успее.
„Обидите да се лиши украинскиот народ од вода, струја и греење е намерен напад врз цивили“ рече Столтенберг во интервју за ДПА во Брисел.

Кремљ со месеци ја бомбардира енергетската инфраструктура на Украина. Денеска Русија започна нови напади низ Украина, вклучувајќи ги Запорожје, Миколаев, Полтава, Днепропетровск и Харков. Мета беше и Киев.

Рускиот претседател Владимир Путин „се обидува да ја искористи зимата како оружје, обидувајќи се да го скрши украинскиот народ со цел да ја поткопа неговата поддршка за украинската самоодбрана“, рече Столтенберг.

Но, генералниот секретар на НАТО е убеден дека стратегијата на Путин нема да успее.

„Историјата всушност нè учи дека овој вид на брутален напад врз цивили не ја ослабува волјата за отпор, туку само ја зајакнува“, рече тој.

Столтенберг смета и дека Путин направил голема грешка со потценувањето на решителноста на членките на НАТО да и помогнат на Украина.

„Сојузниците на НАТО и даваат поддршка на Украина во невидени размери и јасно ставија до знаење дека ќе ја поддржуваат се додека е потребно“, посочи првиот човек на воениот сојуз.