Пукање во Швајцарија - двајца мртви

Утрово во швајцарскиот град Сион на југот на земјата имаше пукање во кое загинаа две лица, а едно беше рането. Полицијата трага по напаѓачот, а мотивите за нападот се уште се нејасни, пишува Дојче веле.

„Според првичните информации, сторителот ги познавал своите жртви“, соопшти полицијата, додавајќи дека 36-годишникот пукал околу 8 часот.

„Напаѓачот е опасен“

Според полицијата, тој испукал неколку истрели на две различни локации во Сион, град со околу 35.000 жители. Полицијата го опиша напаѓачот како опасен.

„Активно го бараме сторителот. Граѓаните во никој случај не треба да се обидуваат да го запрат напаѓачот или да му пријдат. Тој е многу опасен“, предупреди полицијата.

Швајцарија, земја со околу 9 милиони жители, има висока стапка на поседување оружје. Цивилите во Швајцарија поседуваат околу 2,3 милиони огнено оружје.