Страшна сообраќајка кај Струга - тешко повредени млади момчиња

Три лица од кои две посериозно се повредени во сообраќајната незгода што синоќа во 20 часот и 10 минути се случи на магистралниот пат Подмољје-Струга кај крстосницата со локалните патишта за „Еврохотел“ и селото Милешево.

Поради сериозноста на повредите, во општата болница во Струга задржан е 20-годишниот А.З. од струшкото село Ливада додека во болницата Св.Еразмо -Охрид задржано е едно малолетно лице.

Во сообраќајната незгода учествувале патничките моторни возила марка „Голф“ со струшки регистарски ознаки управувано од 24-годишниот Б.М. од селото Франгово во кое се наоѓало малолетното лице и автомобил „Ауди“ управуван од сега повредениот А.З.

Сообраќајната незгода е случена поради непочитување на сообраќајниот знак „Стоп-задолжително запирање“ поставен на локалниот пат за Евро хотел од страна на возачот на патничкиот автомобил „Голф“. Тој невнимателно се вклучил на магистралниот пат без да му отстапи првенство на минување на возилото „Ауди“ кое по магистралниот пат се движело во правец од Охрид кон Струга.

По овластување на Јавниот обвинител, полициски екипи, на местото на сообраќајната незгода извршија увид при што сообраќајот не беше запрен и се одвиваше со пренасочување на возилата по споредни патишта.