Изготвен нов правилник: Се воведуваат четири категории на вода за капење
Се воведуваат четири категории на водата за капење. Изготвен е нов правилник од страна на поголема експертска група кој е во согласност со европските директиви со кој површинските води што со досегашната категоризација не беа за пиење и за капење и според квалитетот припаѓаа на трета категорија, сега стануваат води со одлична состојба и се препорачуваат за капење. Правилникот е објавен во "Службен весник" и стапува на сила осум дена по објавувањето на одлуката, пишува Вест.
Д-р Михаил Кочубовски од Институт за јавно здравје објаснува дека со новиот правилник, кој стапува во сила осум дена по објавување во "Службен весник", се поместени и параметрите, односно количеството бактерии, според кои се одредува дали одредена вода е безбедна за капење.
"Со новиот правилник, сменети се граничните вредности за количеството на бактериите ентероки, а воведена е и бактеријата ешерихија коли како параметар, со кои се одредува дали одредена вода е безбедна за капење или не. Разликата меѓу досегашните и новите параметри практично значи дека тоа што досега било вода од трета категорија и била забранета за капење, сега е вода со одлична состојба. Со овој правилник сега се воведуваат четири категории на вода за капење, односно вода со состојба одлична, добра, задоволителна и незадоволителна. Само водите со незадоволителна состојба не се за капење. Тоа не значи дека оваа вода е безбедна за пиење, туку само за капење. Онаа со задоволителна состојба може да се користи за капење, но мора да се преземат мерки за претпазливост, согласно со ЕУ-директивите", вели д-р Кочубовски за Вест.
Тој објасни дека има нова уредба за квалитетот на површинските води, со која не се опфаќа квалитетот на водите за пиење и за капење, односно дека тие се третираат со посебни правилници.
Правилникот бил подготвуван подолг период.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа