Гелова-Стојанова: Владата на СДС молчи и продолжува со префрлување пари од буџетот на Невладините организации

Веќе 5 дена нема одговор од владата на прашањето, на кои невладини организации се префрлени еден милион евра во предизборниот период и за каква намена ќе бидат користени истите, велат од ВМРО-ДПМНЕ.

Соња Гелова-Стојанова од ВМРО-ДПМНЕ на денешната прес-конференција изјави дека наместо одговор, владата на СДСМ молчи и продолжува со префрлување на пари од буџетот на сметките на Невладините организации.

– Изминатиот период, на сметките на невладините од парите на граѓаните, беа извршени трансфери со кои во еден ден се префрлувале по неколку милиони денари. Па така, на август од буџетот се префрлени 6.755.730 денари, на 23-ти август од буџетот се префрлени 4.666.666 денари, на 24-ти август се префрлени 1.485.000 денари, на 31-ви август се префрлени 3.350.000 денари, додека на 20-ти септември се префрлени 5.266.666 денари, на 26-ти септември се префрлени 16.450.000 денари, додека на 27-ми септември на сметките на невладините организации се префрлени 13.210.000 денари. Повторно го прашуваме СДС, дали се врши масовен поткуп на гласови и дали се прави нов инженеринг за претстојните локални избори, истакна Гелова-Стојанова.

Додаде дека т.н. шарени револуционери кои сега живеат од парите на граѓаните, СДСМ и Заев ќе бидат казнети на локалните избори кои ќе се случат на 15-ти октомври.