Почина Мирослав Наумовски Лав - доајенот на македонското спортско новинарство
Денес, по кратко боледување, почина Мирослав Наумовски-Лав. Лав беше врвен спортист, спортски новинар, еден од основачите на Македонскиот олимписки комитет, член на Собранието и на Управниот одбор на МОК, спортски новинар во Нова Македонија, основач и главен одговорен уредник на првиот спортски весник во нашата држава, СКОК.
Мирослав Наумовски-Лав во „Нова Македонија“, како спортски новинар, поминал 27 години, а известувал од ЛОИ 1974, 2000 и 2004, од ЗОИ 1984 и 1988, од три СП во кошарка, осум ЕП во различни спортови, универзијади, медитерански игри, балканијади.
Неговата најголема спортска љубов бил ракометот. Со македонската репрезентација станал пионерски првак на тогашна Јуугославија (СФРЈ). Во 1962 година бил прв на Младинското првенство на СФРЈ, а во 1965 година и Национален првак во младинска конкуренција. Наумовски бил одличен ракометар и дел од младинската репрезентација на СФРЈ (заедно со генерацијата на Поповиќ, Прибаниќ, Покрајац, Каралиќ…). Најмногу време поминал во Р.К. Вардар, играјќи на позицијата централен бек.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
