Спасовски и Поклукар: Ги зајакнуваме капацитетите на Одделот за воздухопловни единици на МВР

Со словенечка донација од резервни делови и компоненти за леталата ќе се јакнат капацитетите на Одделот за воздухопловни единици на МВР. За таа намена денеска во Љубљана министерот за внатрешни работи Оливер Спасовски и неговиот словенечки колега Боштјан Поклукар потпишаа Меморандум за обезбедување развојна помош помеѓу МВР на Република Северна Македонија и МВР на Словенија за Одделот за воздухопловни единици. 

Целта на донацијата е јакнење на капацитетите на Одделот за воздухопловни единици за извршување на секојдневните полициски задачи, вклучително и задачите за спасување на луѓе, а е со проценета вредност од над 270.000 евра.

-Меморандумот за соработка претставува значајна помош за функционирањето на Одделот за воздухопловни единици од аспект на достапност на делови и хеликоптерски платформи кои ќе овозможат Одделот да продолжи да ги користи хеликоптерите, а воедно и ќе се здобие со нови оспособувања со оглед на медицинските пакети кои ќе бидат дел од помошта, рече Спасовски на прес-конференција по потпишувањето на меморандумот.

Истакнувајќи ја упатеноста на меѓусебна соработка и заедничкиот интерес за големи резултати и голем бенефит од ваквата соработка, што е еднакво важно за двете држави и за регионот, Спасовски заклучи дека таа соработка особено треба да биде интензивирана во делот на билатералната и оперативната меѓународна соработка со МВР на Република Словенија, на полето на организираниот криминал, во борбата против трговијата со луѓе и криумчарењето мигранти, трговијата со дрога и справувањето со илегалната миграција.