Гутереш: 2024 година нека биде година на враќање на довербата

Генералниот секретар на Обединетите нации Антонио Гутереш во видео порака повика 2024 година да биде година на враќање на довербата и враќање на надежта по 2023 година, која, како што наведе, беше година на огромни страдања, насилство и природни катастрофи предизвикани од климатските промени.

Гутереш предупреди дека војните во светот се сè побројни и катастрофални и дека поради оваа причина 2024 година мора да биде година за враќање на довербата и враќање на надежта, пренесе Тас.

„Човештвото е во болка. Нашата планета е во опасност“, предупреди Гутереш.

Генералниот секретар потсети дека 2023 година беше најтоплата година во историјата и дека луѓето ширум светот се погодени од растечката сиромаштија и глад, пренесува Танјуг.

„Мораме да се погрижиме новите технологии, како што е вештачката интелигенција, да бидат сила за добро“, рече Гутереш.

На крајот од видео пораката тој посака среќна и мирна Нова година.