На што треба да се придржувате за да не ве бие малер - утре е Свети Василиј Велики

Се верува дека на денот на Свети Василиј нема потреба да се расправате, затоа што во спротивно луѓето ќе бидат принудени цела година тоа да го прават, додека во некои делови се верува дека треба да бидете особено претпазливи да не бидете измамени. И ако врне снег годината ќе биде родна.

Утре ќе го славиме Свети Василиј Велики, кој се упокоил на овој ден. Тој е еден од тројцата најголеми црковни учители од четвртиот век. Родум бил од Кападокија, завршил школа во Атина. Бил голем христијански филозоф, а се прославил и како епископ и заштитник на чистотата на православното учење.

Поради совпаѓањето со празникот на Свети Василиј овој празник во народот најчесто е познат како Василица, а тоа најповеќе асоцира на обичаите и верувањата поврзани со Новата Година. Василица се паѓа во периодот на т.н. Некрстени денови, период што трае од Божик до Водици.